ཕྱི་ལོ་ ༢༠༡༩ ལོའི་ཀིརྟིའི་དགེ་རྩ་ཚོགས་པའི་ཚོགས་ཆེན་གྱི་གྲོས་ཆོད་དགོངས་དོན་ལྟར་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞབས་བརྟན་དུ་རྒྱལ་བའི་བཀའ་འགྱུར་དག་འདོན་གནང་བ།

༄༅།། འདི་ལོའི་ཀིརྟིའི་དགེ་རྩ་ཚོགས་པའི་ཚོགས་འདུ་ཆེན་མོ་ཐེངས་བའི་སྐབས་སྤྱི་མོས་གྲོས་ཆོད་བྱུང་བ་ལྟར། ལྷར་བཅས་སྲིད་ཞིའི་གཙུག་རྒྱན་འཛམ་གླིང་ཞི་བདེའི་དེད་དཔོན་༸སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་མཆོག་གི་སྐུ་ཚེ་མཛད་འཕྲིན་རྒྱས་ཆེད་སྤྱི་དང་། རང་ལུགས་དགུང་གྲངས་བརྒྱད་ཅུ་གྱ་ལྔར་ཕེབས་པའི་སྐུའི་དགུང་ཀེག་གི་མཚན་མ་ཅི་མཆིས་ལྷག་མེད་དུ་ཞི་ནས་བསྟན་འགྲོའི་མགོན་དཔུང་དམ་པར་སྐུ་ཚེ་ཞབས་པད་བསྐལ་པ་རྒྱ་མཚོའི་བར་དུ་མི་འགྱུར་རྡོ་རྗེའི་གཤིས་སུ་བརྟན་པར་བཞུགས་པ་དང་།

༸རོང་ཆེན་བསྟན་པའི་སྒྲོན་མེ་༸སྐྱབས་རྗེ་ཀིརྟི་རིན་པོ་ཆེ་མཆོག་གི་སྐུའི་འཁྲུངས་ཚེས་ལ་བཀྲ་ཤིས་བདེ་ལེགས་གྲངས་མེད་ཞུ།

ཕྱི་ཟླ་ ༨ ཚེས་ ༨ ཉིན་གྱི་སྨན་སྦྱིན་གསལ་བསྒྲགས།

༄༅།། ཀུན་གྱི་དགོངས་པར་མངའ་གསལ་བཞིན་ལོ་རེའི་ཕྱི་ཟླ་ ༨ ཚེས་ ༨ ཉིན་ཏེ་༸སྐྱབས་རྗེ་ཀིརྟི་རིན་པོ་ཆེ་མཆོག་གི་འཁྲུངས་ཚེས་དང་སྟབས་བསྟུན་ནས་འཛམ་གླིང་ཞི་བདེའི་དེད་དཔོན་༸སྤྱི་ནོར་གོང་ས་སྐྱབས་མགོན་ཆེན་པོ་མཆོག་དང་། ༸སྐྱབས་རྗེ་ཀིརྟི་རིན་པོ་ཆེ་རྣམ་གཉིས་ཀྱི་གཙོས་བསྟན་འཛིན་གྱི་སྐྱེས་བུ་དམ་པ་རྣམས་ཀྱི་སྐུ་ཚེ་ཞབས་པད་ཡུན་དུ་བརྟན་ཅིང་མཛད་འཕྲིན་རྒྱས་པའི་ཆེད་དུ་དམིགས་ནས་ཀིརྟིའི་དགེ་རྩ་ཚོགས་པ་དང་། ཀིརྟིའི་བྱེས་པ་གྲྭ་ཚང་། ཀིརྟིའི་བྱེས་པ་གྲྭ་ཚང་གི་བླ་སྤྲུལ་ལྷན་རྒྱས་ཐུན་མོང་གི་ངོས་ནས་བཞུགས་སྒར་ཁུལ་གྱི་བོད་ཀྱི་སྨན་རྩིས་ཁང་སྟེང་འོག་གཉིས་དང་བདེ་ལེགས་སྨན་ཁང་སྟེང་འོག་གཉིས། དེ་བཞིན་བླ་སྨན་ཡེ་ཤེས་དོན་ལྡན་གྱི་སྨན་ཁང་སོགས་སྨན་ཁང་ཁག་ཅིག་གི་ནད་པ་རྣམས་ལ་སྨན་སྦྱིན་ཞུ་བཞིན་ཡོད་པ་ལྟར་ད་ལོ་ཡང་གོང་ཚེས་ཉིན་ཟུར་སྦྱར་གསལ་བསྒྲགས་ནང་གསལ་བའི་སྨན་ཁང་ཁག་ཏུ་སྨན་སྦྱིན་ཞུ་རྒྱུ་ཡིན་ལགས་ན་དགོས་ངེས་ནད་པ་རྣམས་ཀྱིས་ཐུགས་སྣང་གིས་ངེས་ཕེབས་ཡོང་བའི་གསལ་བརྡ་རུ། ཕྱི་ལོ་ ༢༠༡༩ ཟླ་ ༨ ཚེས་ ༢ ལ།

ཕྱི་ལོ་ ༢༠༡༩ ལོའི་སྐབས་ལྔ་པའི་ཕར་ཕྱིན་སློབ་ཐོན་པའི་རྒྱུགས་སྤྲོད་ཆེན་མོ་ལེགས་པར་གྲུབ་པ།

ཕྱི་ལོ་ ༢༠༡༩ ལོའི་སྐབས་ལྔ་པའི་ཕར་ཕྱིན་སློབ་ཐོན་པའི་རྒྱུགས་སྤྲོད་ཆེན་མོ་ཕྱི་ཟླ་ ༦ ཚེས་ ནས་དབུ་འཛུགས་གནང་སྟེ་ཕྱི་ཚེས་ ༢༦ ཉིན་ཡོངས་སུ་གྲུབ་པར་མ་ཟད། རྒྱུགས་འབྲས་ཀྱང་གསལ་བསྒྲགས་གནང་བར་ཐེངས་འདིའི་རྒྱུགས་སྤྲོད་ལ་ཞུགས་མཁན་ཕར་ཕྱིན་སྐབས་བརྒྱད་པའི་འཛིན་གྲྭ་མི་གྲངས་བཅུ་གསུམ་ཡོད་པ་ནས་ཨང་སྡེ་དང་པོའི་གྲས་བཅུ་དང་། ཨང་སྡེ་གཉིས་པའི་གྲས་གསུམ་ཡིན་པས་ཚང་མས་ཚད་མཐོན་པོའི་སྒོ་ནས་རྒྱུགས་འཕྲོད་ཡོད་པ་ནི་རྒྱུགས་སྤྲོད་མཁན་ཙམ་མིན་པར། དགེ་སློབ་ལས་བྱེད་ཚང་མའི་ངོས་ནས་ཧ་ཅང་དགའ་འོས་པའི་དོན་བཟང་ཞིག་ཅི་ལ་མིན། ཁོང་རྣམ་པས་ཕར་ཕྱིན་ལོ་རིམ་དྲུག་དང་། དེའི་སྔོན་དུ་བསྡུས་གྲྭ་དང་། བློ་རིག རྟགས་རིགས། ས་ལམ་གྲུབ་མཐའ་སོགས་ལ་སྦྱངས་པ་རིམ་གནང་མཐར་འདི་ལོར་ཕར་ཕྱིན་སློབ་ཐོན་པའི་རྒྱུགས་སྤྲོད་གནང་བ་ཞིག་ཡིན་པ་དང་།