སྤེལ་དུས: 11 ཟླ་བདུན་པ། 2016

ཀློག་གྲངས་: 14102

སློབ་དཔོན་རེ་མདོ་དཀོན་མཆོག་སེངྒེ།

༄༅།། བོད་ཀྱི་ཤེས་ཡོན་ལོ་རྒྱུས་ནང་རྩོམ་རིག་ཅེས་པའི་ཐ་སྙད་འདི་བྱུང་བ་མི་སྔ་ཞིང༌། གོ་དོན་གཏིང་ཚུགས་པ་ཞིག་ཀྱང་ཕལ་ཆེར་ཆགས་ཡོད་ཚོད་མི་འདུག བོད་ཕྱི་ནང་གི་རྩོམ་རིག་མཁས་པའི་ཁྲོད་སྙན་ངག་དང་རྩོམ་རིག་གཉིས་གོ་བ་གཅིག་དང་ཐ་དད་དུ་འཁྱེར་བའི་འགྲེལ་ལུགས་མི་འདྲ་བ་ཇི་སྙེད་ཡོད་ཚོད་ཀྱང༌། ང་ཚོས་ཐ་སྙད་འདིའི་གོ་དོན་དཔྱིས་ཕྱིན་པ་རྟོགས་དགོས་ན་ཐ་སྙད་འདི་སྐད་ཡིག་གང་ནས་འགྱུར་བའི་མ་སྐད་ཀྱི་ཐ་སྙད་དེའི་གོ་དོན་དང༌། རྩོམ་རིག་ཅེས་པའི་ཐ་སྙད་ཧྲིལ་པོ་འདི་ལ་བོད་རང་གི་སྐད་ཀྱི་གྲུབ་སྟངས་དང་གཤིས་ཀའི་ཐོག་ནས་གོ་བ་ཅི་ཞིག་འབབ་ཀྱི་ཡོད་མེད་ལ་བརྟག་པ་ཞིག་ངེས་པར་བྱ་དགོས། བོད་སྐད་ཀྱི་གྲུབ་སྟངས་དང་གཤིས་ཀའི་ཐོག་ནས་རྩོམ་རིག་ཅེས་པ་ཡང་རྩོམ་རིག་པ་ཞེས་པའི་བསྡུས་ཚིག་སྟེ་ནང་དོན་རིག་པ་དང༌། ཚད་མ་རིག་པ། སྒྲ་རིག་པ། བཟོ་རིག་པ། གསོ་བ་རིག་པ་ཞེས་པ་དང་འགྲོས་གཅིག་པའི་གོ་བ་ཞིག་ཀྱང་ཡོད་ངེས་པར་མ་ཟད།

སྤེལ་དུས: 11 ཟླ་བདུན་པ། 2016

ཀློག་གྲངས་: 16345

 སློབ་དཔོན་ཆེན་མོ་འབྲིང་བ་དཀོན་མཆོག་འཇིགས་མེད།

གླེང་གཞི།

༄༅།། བདག་ལེགས་སུ་འདོད་པ་རྣམས་ཤེས་ཉོན་གྱི་སྒྲིབ་པའི་འཆིང་བ་ལས་གྲོལ་བའི་དངོས་བརྒྱུད་ཀྱི་ཐབས་སྣ་ཚོགས་པ་ལས། རྗོད་བྱེད་ཀྱི་སྒྲའི་ལམ་ནས་དོན་བརྡ་སྤྲད་དེ་རྨོངས་པ་སེལ་བར་བྱེད་པའི་རིག་ལམ་སྤྱི་དང༌། ཁྱད་པར་སྐད་ཆའི་སྒྱུ་རྩལ་གྱི་བརྗོད་ཐབས་ཕུན་སུམ་ཚོགས་པའི་སྙན་ངག་གམ་སྙན་ཚིག་གི་མཛེས་སྡུག་ཉམས་འགྱུར་གང་ཞིག་ཡིན་ཡང་ཚིག་སྦྱོར་གྱི་ཕྲེང་བ་ལ་མ་བརྟེན་པར་སྟོན་ཐབས་ཡེ་ནས་མེད་པས། ཚིག་ཕྲེང་ནི་སྙན་ངག་གི་ཤིན་ཏུ་གལ་གནད་ཆེ་བའི་གྲུབ་ཆ་ཞིག་ཡིན་ཞིང༌། གྲུབ་ཆ་དེ་ལ་སྙན་ངག་གི་ལུས་ཞེས་གྲགས་པ་དང༌། དེ་ལ་བཅད་ལྷུག་སྤེལ་གསུམ་གྱི་རིགས་མི་འདྲ་བ་གསུམ་ཡོད། དེའང་སྙན་ངག་གི་ལུས་ལ་བཅད་ལྷུག་སྤེལ་གསུམ་ཡོད་ཀྱང༌། བཅད་ལྷུག་སྤེལ་གསུམ་ནི་སྙན་ངག་ཁོ་ནའི་ལུས་ཤིག་མ་ཡིན་པར།

སྤེལ་དུས: 08 ཟླ་བདུན་པ། 2016

ཀློག་གྲངས་: 30111

རིགས་ལམ་དགེ་རྒན་དཀོན་མཆོག་རྒྱ་མཚོ།

༄༅།། བདེན་གཉིས་ཟུང་འཇུག་ཡེ་ཤེས་ཀྱིས། །བདེན་གཉིས་ཅིག་ཆར་ཡང་དག་མཁྱེན། །བདེན་གཉིས་གནས་ལུགས་མ་ནོར་བར། །འགྲོ་ལ་འདོམས་མཁས་རྒྱལ་རྣམས་མཆོད། །བློ་གྲོས་བཟང་པོས་ཆོས་ཀུན་གཟིགས། །གྲགས་པའི་སྙན་པ་ཕྱོགས་བཅུར་གཡོ། །ཞིང་འདིར་རྒྱལ་བསྟན་ཕན་བདེའི་དཔལ། །གསལ་མཛད་འཇམ་དབྱངས་བླ་མར་འདུད། །བློ་གྲོས་བཟང་པོའི་རྣམ་དཔྱོད་ཀྱིས། །རྒྱལ་བསྟན་འཛིན་ཅིང་སྤེལ་བ་ལ། །འཇིགས་བྲལ་མཚུངས་མེད་འགྲོ་བའི་སྐྱབས། །ཡེ་ཤེས་རྒྱ་མཚོའི་གཏེར་ཆེན་རྒྱལ། །

                དེ་ཡང་ཇི་སྐད་དུ། དཔལ་མགོན་འཕགས་པ་ཀླུ་སྒྲུབ་ཀྱིས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང༌། །དམ་པའི་དོན་གྱི་བདེན་པའོ། །ཞེས་གསུངས་པ་ལྟར།  ཐུབ་པ་སངས་རྒྱས་བཅོམ་ལྡན་འདས་རྣམས་ཀྱིས་ཆོས་གང་གསུངས་ཐམས་ཅད་བདེན་གཉིས་ལས་མ་འདས་པར་གསུངས་ལ། དེའི་ཕྱིར་རང་ཅག་རྣམས་ཀྱིས་བདེན་གཉིས་ཀྱི་རྣམ་གཞག་ཕྱིན་ཅི་མ་ལོག་པར་ཤེས་དགོས་པས་དེའི་རྣམ་གཞག་མདོ་ཙམ་བཤད་པ་ལ་གཉིས། གྲུབ་མཐའ་སོ་སོའི་ལུགས་ཀྱི་བདེན་གཉིས་བཤད་པ་དང་ཞར་བྱུང་བདེན་བཞིའི་རྣམ་གཞག་བཤད་པའོ།།

སྤེལ་དུས: 08 ཟླ་བདུན་པ། 2016

ཀློག་གྲངས་: 16033

 མཁན་པོ་ཕུན་ཚོགས་སྤྲུལ་སྐུ།

༡༽ སྐབས་དོན་འཚོལ་བའི་དགོས་པ་རྒྱུ་མཚན་བཅས་སྔོན་གླེང་གི་རིམ་པ།

                དུས་རབས་ཉི་ཤུ་པའི་ནང་གངས་ཅན་འགྲོ་བའི་ལྷ་གཅིག་ཕྱག་ན་པདྨོའི་ཐུགས་རྗེ་དང་བཀའ་དྲིན་གྱི་མཛད་རླབས་ཁོ་ནར་བརྟེན། གོ་ལ་ཧྲིལ་པོ་འདིར་ལྷན་དུ་འཚོ་བའི་འགྲོ་བ་སྤྱིའི་ཕན་གནོད་དང༌། ལྷག་པར་ནང་སེམས་ཀྱི་བདེ་སྐྱིད་དང་འབྲེལ་ཆེ་བའི་བོད་བརྒྱུད་ནང་བསྟན་གྱི་འཕེལ་ཕྱོགས་རྒྱལ་མཚམས་མང་པོར་བརྒལ་བ་དང་ལྷན། བོད་དུ་དར་བའི་ཆོས་བརྒྱུད་ཆེན་པོ་བཞི་ནང་ཕན་ཚུལ་བར་འབྲེལ་ལམ་དང༌། ལྟ་སྤྱོད་མཐར་ཐུག་གི་དགོངས་དོན་གཅིག་ཏུ་གྲུབ་ཚུལ་སོགས་ཀྱི་ཐད་སྒོ་གང་ས་ནས་ཇེ་རྒྱས་དང་ཇེ་ལེགས་སུ་འགྲོ་བཞིན་ཡོད་ནའང༌། ཆོས་བརྒྱུད་དེ་དག་གི་ལྟ་བའི་འབབ་སྟེགས་གཅིག་ཏུ་གྲུབ་ཚུལ་ཇི་བཞིན་མ་ཤེས་ཚེ། ཆོས་བརྒྱུད་རིས་མེད་ཅེས་པའི་ཚིག་དེ་བརྒྱ་སྟོང་བགྲངས་ཀྱང་མིང་དོན་མཚུངས་པ་ཞིག་ཡོང་དཀའ་བར་བརྟེན། སྔར་ལོ་རྒྱུས་ཀྱི་བྱུང་བའི་ཁྲོད་བཞག་པའི་ཆོས་བརྒྱུད་ནང་ཁུལ་འཐེན་འཁྱེར་གྱི་བག་ཆགས་ངན་པ་དེ་འབྱུང་འགྱུར་ཡང་ཅུང་ལྷག་མི་སྲིད་པ་ཞིག་མིན།

སྤེལ་དུས: 08 ཟླ་བདུན་པ། 2016

ཀློག་གྲངས་: 20477

ཆབ་ཚང་འཇམ་དཔལ།

དང་པོ། སྤྱོད་འཇུག་ཆེན་མོ་མཛད་པ་པོའི་རྣམ་ཐར།

                དེ་ཡང༌། རྒྱལ་སྲིད་རབ་སྤངས་གྲུབ་པ་བརྙེས། །གཙུག་ལག་གཉིས་ཀྱི་ཕྱོགས་ལས་རྒྱལ། །རབ་བྱུང་བདེན་གཟིགས་རྫུ་འཕྲུལ་བསྟན། །ངོ་མཚར་བདུན་ལྡན་དེ་ལ་འདུད། །ཅེས་ཇི་སྐད་སྨྲས་པ་ལྟར་བདག་ཉིད་ཆེན་པོ་ཞི་བའི་ལྷ་འདི་ཉིད་རྒྱ་གར་ནུབ་ཕྱོགས་ཀྱི་ཡུལ་སཽ་རཱ་ཥ་ཊའི་མངའ་བདག་རྒྱལ་པོ་དགེ་བའི་གོ་ཆ་དང་ཡུམ་རྡོ་རྗེ་རྣལ་འབྱོར་མའི་སྤྲུལ་པར་གྲགས་པ་སྲིད་འབྱོར་མངའ་ཐང་རྒྱས་པ་ཞིག་ཡོད་པ་གཉིས་ཀྱི་སྲས་སུ་དུས་རབས་བདུན་པའི་དཀྱིལ་སྨད་ཙམ་ལ་གཟུགས་སྐུ་མངོན་པར་བལྟམས་ཤིང༌། མཚན་ལ་ཞི་བའི་གོ་ཆ་(འཇམ་དབྱངས་རྣམ་སྤྲུལ་ཞི་བ་ལྷས། །སློབ་དཔོན་ཛེ་ཏཱ་རེས་ཞི་བའི་ལྷ་རྗེ་བཙུན་འཇམ་དབྱངས་ཀྱི་རྣམ་སྤྲུལ་ཡིན་པར་གསུངས་པ་དང༌། འཕགས་པ་ཞི་བ་ལྷ་ཉིད་ཀྱིས། །ཞེས་ཤེར་འབྱུང་བློ་གྲོས་ཀྱིས་འཕགས་པའི་གང་ཟག་ཏུ་གསུངས་པ་དང༌།