༄༅།།ཕྱི་ལོ་༢༠༡༦ ལོའི་ཟླ་༩ ཚེས་༡༦ ཉིན་དབུས་བོད་མིའི་སྒྲིག་འཛུགས་ཀྱི་ཤེས་རིག་ལྷན་ཁང་གི་བཀའ་བློན་དངོས་གྲུབ་ཚེ་རིང་མཆོག་སྐུ་མགྲོན་གཙོ་བོ་དང་། བཙན་བྱོལ་བོད་མིའི་ཤེས་ཡོན་ལྷན་ཚོགས་ཀྱི་འགན་འཛིན་གྱིས་དབུས་པའི་འབྲེལ་ཡོད་སྲི་ཞུ་པ་རྣམ་པ། འཕགས་ཡུལ་ཀིརྟིའི་བྱེས་པ་གྲྭ་ཚང་གི་མཁན་རིན་པོ་ཆེས་གཙོས་ལས་སྣེ་དང་དགེ་རྒན་རྣམ་པ། ཉེ་འཁོར་གྱི་སློབ་གྲྭ་ཁག་གི་སློབ་སྤྱི་
དང་དགེ་རྒན། རྡ་ཤོད་བོད་ཁྱིམ་དང་དཔེ་སྟོན་སློབ་གྲྭ་གཉིས་ཀྱི་འཛིན་གྲྭ་དྲུག་པ་ཡན་གྱི་སློབ་མ་རྣམས། གསར་འགོད་པ་བཅས་མི་སུམ་བརྒྱ་ཡས་མས་འཛོམས་པའི་དཀྱིལ་དུ་༸སྐྱབས་རྗེ་ཀིརྟི་རིན་པོ་ཆེའི་གསུང་རྩོམ་ཕྱོགས་སྒྲིག་པ་དང་འདི་གའི་གྲྭ་ཚང་གི་རིག་གནས་སློབ་དཔོན་རྒན་རེ་མདོ་སེངྒེ་ལགས་ཀྱིས་བརྩམས་པའི་གཏམ་རྒྱུད་ཀྱི་ལམ་ནས་མེས་པོའི་ཞབས་རྗེས་འཚོལ་བ་ཞེས་པའི་དཔེ་དེབ་དབུ་འབྱེད་བྱས།
དཔེ་དེབ་འདི་དག་ནི་ཤེས་རིག་ལྷན་ཁང་གིས་ནན་ཆེས་ཐུགས་རེ་གནང་དོན་ལྟར་ཕྱི་ལོ་༢༠༡༢ ལོ་ནས་བཟུང་སྟེ་རྩོམ་པ་པོ་རེ་མདོ་སེངྒེ་ལགས་ཀྱིས་རང་ཉིད་སྒེར་ལ་དབང་བའི་ངལ་གསོ་དང་སློབ་སྦྱོང་གི་དུས་ཚོད་བེད་སྤྱད་དེ་བརྩམས་པ་དང།རྩོམ་ཡོན་མ་
བཞེས་པར་རིན་མེད་ཀྱི་ཐོག་ནས་བརྩམས་གནང་བ་ཞིག་ཡིན་འདུག
དཔེ་དེབ་འདི་དག་རྩོམ་དགོས་པའི་རྒྱུ་མཚན་ནི། རྩོམ་པ་པོས་དཔེ་དེབ་སྔོན་གླེང་དུ། སྲོལ་རྒྱུན་དང་དེང་རབས་ཀྱི་བར་མ་དོ་རུ་ལྷག་པ་ནི། ཀུན་སྤྱོད་ཉམས་རྒུད་དུ་འགྲོ་བའི་རྐྱེན་རྩ་གཙོ་བོ་ཞིག་ཡིན་པས། མི་གཤིས་དང་ཀུན་སྤྱོད་ཉམས་རྒུད་དུ་འགྲོ་བཞིན་པའི་སྤྱི་ཚོགས་ཤིག་ལ་མཚོན་ན། སྲོལ་རྒྱུན་གྱི་བཟང་པོའི་ཀུན་སྤྱོད་དང་། བསམ་བློའི་དཔལ་ཡོན་ལ་བརྟེན་ནས། མི་གཤིས་དང་ཀུན་སྤྱོད་བསྐྱར་གསོ་བྱ་བ་ནི། མི་ངོ་མར་འགྱུར་བའི་བྱེད་ཐབས་གཏན་ཚིགས་ལྡན་པ་ཞིག་ཏུ་གྱུར་ཡོད། ཅེས་དང།
ཡང་གླེང་བརྗོད་དུ། ྋགོང་ས་ྋསྐྱབས་མགོན་ཆེན་པོ་མཆོག་གིས། བོད་རིགས་གཞོན་སྐྱེས་རྣམས་བོད་མིའི་ཤེས་ཡོན་དང༌། བསམ་བློ།ཀུན་སྤྱོད་བཅས་ཀྱི་གཞི་རྩ་ཡོད་པའི་ཐོགདེང་རབས་ཤེས་ཡོན་གྱི་གནས་ཚད་འདང་ངེས་ཀྱི། འདབ་གཤོག་གཉིས་ལྡན་ཞིག་ཏུ་བསྐྱེད་བསྲིང་བྱ་དགོས་པའི་ཐུགས་རེ་མཛད་པ་དང་མཉམ་དུ། ཡུལ་ལུང་དང༌། རིགས་རུས། ཤ་མདོག དབུལ་ཕྱུག ཤེས་ཡོན་ཡོད་མེད་བཅས་ཀྱི་ཁྱད་པར་ལ་མ་ལྟོས་པར། མི་ཡོངས་རྫོགས་བསམ་བློ་དང་ཀུན་སྤྱོད་གཞན་ཕན་ཚུལ་མཐུན་ཞིག་ཡོང་དགོས་པའི་གལ་གནད་ལ་དགོངས་ཏེ། འཛམ་གླིང་སྤྱིའི་ཤེས་ཡོན་ལམ་ལུགས་ཁྲོད་ལྷགས་པའི་བསམ་བློ་དང་ཀུན་སྤྱོད་ཀྱི་སྟོང་ཆ་མང་པོ་ཞིགབོད་ཀྱི་རིག་གཞུང་དང་སྤྱི་ཚོགས་ཀྱི་ཤེས་ཡོན་ལམ་ལུགས་ཀྱི་ཐོག་ནས། སྐོང་ཐུབ་པའི་ནུས་པ་དམིགས་བསལ་བ་ཞིག་ཡོད་པ་དེ་དགསྔོག་འདོན་བྱ་དགོས་པའི་བཀའ་སློབ་སྔ་ཕྱིར་ཕེབས་ཡོད།
དེ་བཞིན་ྋསྐྱབས་རྗེ་ཀིརྟི་རིན་པོ་ཆེ་མཆོག་གིས་ཀྱང༌། བོད་ཀྱི་མ་འོངས་པའི་ཆོས་སྲིད་ཀྱི་གནས་སྟངས་གང་འདྲ་ཞིག་ཏུ་འགྱུར་མིན། ད་ལྟའི་གཞོན་རབས་པ་རྣམས་ཀྱི་ཤེས་ཡོན་དང་ཀུན་སྤྱོད་ལ་རག་ལས་ཤིང༌། ཁོང་ཚོ་ཤེས་ཡོན་དང་གཞན་ཕན་བཟང་སྤྱོད་ལྡན་པ་ཞིག་ཡོང་ཐུབ་མིན་ཡང་། མིག་ལྟོས་དང་གསོ་སྐྱོང་བྱེད་སྟངས་ལ་རག་ལས་པས། གཞོན་སྐྱེས་ཚོར་སློབ་དེབ་ངོས་ཀྱི་སློབ་སྦྱོང་སྤྲད་པ་ཙམ་མ་ཡིན་པར།ཆུང་དུས་ནས་གཞན་ཕན་བཟང་སྤྱོད་གཤིས་རྒྱུད་དང་འདྲེས་པ་ཞིག་ཡོང་ཐབས་བྱ་བ་དགོས་པ་ནི། ཤིན་ཏུ་གལ་གནད་ཆེ་བའི་ཚུལ་གསུང་གི་ཡོད་པར་བརྟེན། གསུང་ཚིག་འདི་ཕྲན་གྱི་དྲན་ངོས་ནས་ཡལ་ཐབས་མེད་པའི་རྡོ་རིང་ལྟ་བུ་ཞིག་ཏུ་གྱུར། ཅེས་དང།
ཡང་དེ་ཉིད་དུ། ཞིབ་ཏུ་བསམ་པའི་སྐབས་དེང་སང་ཀློག་དེབ་མང་ཙམ་མཐོང་རྒྱུ་འདུག་མོད། བོད་རང་གི་འཚོ་བ་དང་མི་སྣ་རྩོམ་སྙིང་བྱས་ནས་བྲིས་པ་ཉུང་ཞིང་། བསྒྱུར་རྩོམ་གྱི་རིགས་མང་ཆེ་བ། ཚིག་བརྗོད་ཀྱི་ཐོག་ནས་བོད་སྐད་ཀྱི་ཚིག་འགྲོས་ངོ་མར་གྱུར་ཐུབ་མེད་པའི་ཐོགབསམ་བློ་དང་གོམས་གཤིས་གཉིས་ཀ་བོད་ཀྱི་ཁྱད་ཆོས་ལྡན་པ་ཞིགརང་བཞིན་གྱིས་ཡོང་དཀའ་བས། མི་གཤིས་དང་ཀུན་སྤྱོད་ཉམས་གསོ་བྱེད་པའི་དམིགས་ཡུལ་གྱི་ཐད་ནས་བལྟས་ན། བོད་སྐད་དང་བོད་དྲི་ངོ་མ་ཚོར་ཐུབ་པ་དང༌། བོད་རང་གི་མི་སྣ་རྩོམ་སྙིང་བྱས་པའི་ཀློག་དེབ་རིགས་དགོས་པ་ཤིན་ཏུ་གལ་གནད་དུ་གྱུར་ཡོད་པས།བྱ་སྒྲུང་བྱེའུ་སྒྲུང་དང་། གཞན་གྱི་མི་སྣ་རྩོམ་སྙིང་བྱས་པའི་སྒྱུར་རྩོམ་ཙམ་མ་ཡིན་པར། བོད་སྐད་ངོ་མའི་རྗོད་ཚིག་
དང་། བོད་མི་ངོ་མ་རྩོམ་སྙིང་བྱས་པའི་ཀུན་སྤྱོད་སློབ་གསོ་དང་འབྲེལ་བའི་ཀློག་དེབ་རིགས། ཤིན་ཏུ་དགོས་གལ་ཆེན་པོར་གྱུར་པའི་དངོས་ཡོད་གནས་ཚུལ་གྱི་ཐོག་ནས། ལས་བྲེལ་དང་དུས་ཚོད་ཀྱི་དཀའ་ངལ་ཡོད་མེད་ལ་མ་ལྟོས་པར། བོད་སྐད་དང་བོད་གཤིས་ངོ་མ་ལྡན་པའི་བོད་ཡིག་གི་ཀློག་དེབ་འགའ་ཤས་འབྲི་རྒྱུ་དང་ལེན་ཞུས།
ནང་དོན་དང་རྩོམ་ཐབས་ཇི་ལྟར་ཡིན་པའི་ཚུལ་ནི་དེ་ཉིད་ལས། ཀློག་དེབ་འདི་དག་སྒྱུ་རྩལ་དང་རྩོམ་ཐབས་ཀྱི་ཐད་ནས་གནས་ཚད་ལོངས་པ་ཞིག་བྱུང་ཡོད་པའི་སྤོབས་པ་མི་འདུག་ཀྱང་། སྔ་མོ་ནས་སྐྱེས་བུ་དམ་པ་མང་པོའི་རྣམ་ཐར་ཁག་ལ་མཇལ་བའི་སྐབས། ཆོས་ལུགས་ཀྱི་ལྟ་ཚུལ་རྐྱང་པ་མ་ཡིན་པར། མི་གཞི་དང་བསམ་བློ། ཡ་རབས་བཟང་པོའི་ཀུན་སྤྱོད། ཤེས་ཡོན་སློབ་སྦྱོང་གི་ལྟ་བ་དང་ཧུར་བརྩོན་བཅས། གང་ཅིའི་ཐད་ནས་ཁོང་རྣམ་པའི་མཛད་སྤྱོད་ནི། ང་ཚོས་མིག་དཔེར་ལྟ་འོས་པ་ཤ་སྟག་ཡིན་པའི་ངོས་འཛིན་གཏིང་ཟབ་ཡོད། དེར་བརྟེན་ཀློག་དེབ་འདི་དག་འབྲི་འགོ་འཛུགས་པའི་སྐབས་སུ་ཡང། རྟོག་པ་འཆར་ཡན་གྱི་ཀློང་ནས་གང་བྱུང་བཏུས་སྒྲིག་བྱས་པ་ཙམ་མ་ཡིན་པར། ཁོང་རྣམ་པའི་ཡ་རབས་ཚུལ་མཐུན་གྱི་ཀུན་སྤྱོད་དང་མི་གཤིས། ཤེས་ཡོན་དོན་དུ་གཉེར་བའི་དམིགས་རྒྱང།མདོར་ན། མིག་སྔའི་འགོག་རྐྱེན་ཡོངས་རྫོགས་ལ་གདོང་ལེན་བྱས་ཏེ། རང་ཉིད་ཤེས་ཡོན་ལྡན་པ་དང་། ཀུན་སྤྱོད་ལྡན་པ། གཞན་ཕན་གྱི་ཁོག་རྒྱ་ཡོད་པ་བཅས་ཇི་ལྟར་བྱས་པའི་ཚུལ་རྣམ་ཐར་དང་ལོ་རྒྱུས་སོ་སོ་ལས་དྲངས་ཏེ། ཅི་ནུས་ཀྱིས་ཚིག་བརྗོད་སླ་བོར་བཅོས་ཤིང་། གཏམ་རྒྱུད་ཀྱི་རྩོམ་ཐབས་སྤྱད་ནས་བྲིས་ཡོད། ཅེས་དང།
ཀློག་དེབ་འདི་དག་འབྲི་སྟངས་ཀྱི་རྣམ་པ་ནི། རྩ་བའི་བྱུང་བ་རྣམས་མི་སྣ་སུ་ཡིན་པ་དེའི་རྣམ་ཐར་དང་ལོ་རྒྱུས་གཞི་ལ་བཞག་ནས་བྲིས་ཡོད་ཀྱང༌། གཏམ་བརྗོད་དང་རྣམ་འགྱུར་སོགས་མི་སྣའི་ཕྱིའི་ཉམས་འགྱུར་དང་། ཁོར་ཡུག་གི་གནས་སྟངས་མང་དག་ཅིག་རྩོམ་པ་པོས་བཅོས་སྒྲིག་བྱས་ཏེ། གཏམ་བརྗོད་ཟློས་གར་དང་འཁྲབ་གཞུང་གི་རྣམ་པ་ཐོན་ཐབས་ཞུས་ཤིང་། མི་སྣའི་གཏམ་བརྗོད་ཀྱང་གོ་བདེ་བོ་ཡོང་ཐབས་གཙོ་འདོན་བྱས་ཡོད་འདུག་པ་བཅས།