༄༅།། བོད་ལུགས་ལྟར་ན་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་དགུ་བཅུ་ཐམ་པར་ཕེབས་པའི་གོ་སྟོན་དང་བཀའ་དྲིན་རྗེས་དྲན་ལ་ཆེད་དུ་དམིགས་ཏེ། ཕྱི་ལོ་ ༢༠༢༥ ཟླ་ ༡ ཚེས་ ༧ དང་། བོད་ཟླ་ ༡༡ ཚེས་ ༨ ནས་རྡོར་གདན་ཀིརྟིའི་སྒར་བསམ་ཡས་གླིང་དུ་སྨོན་ལམ་ཆེན་མོ་ཉིན་གསུམ་ལ་ཚོགས་སྐབས་ཀྱི་ཉིན་དང་པོའི་འདྲ་པར་དང་མཛད་རིམ་ཁག
སྨོན་ལམ་ཆེན་མོ་ཉིན་དང་པོ།
༸གོང་ས་༸སྐྱབས་མགོན་༸རྒྱལ་བའི་དབང་པོ་མཆོག་གི་སྐུའི་བླ་གཟའ་ལྷག་དཀར་གྱི་ཉིན་མོ་སྟེ་ཕྱི་ལོ་ ༢༠༢༥ ཟླ་ ༡ ཚེས་ ༨ བོད་ཟླ་ ༡༡ ཚེས་ ༩ སྨོན་ལམ་ཆེན་མོ་ཉིན་དང་པོའི་མཛད་རིམ།
༡༽ ཞོགས་པ་ཆུ་ཚོད་ ༦ པའི་ཐོག་ཕྱོགས་གཞན་དུ་བཞུགས་པའི་དགེ་འདུན་པ་རྣམས་བཞུགས་གནས་སོ་སོ་ནས་བསམ་ཡས་གླིང་དུ་གདན་འདྲེན་དང་བཅས། ཆུ་ཚོད་ ༦།༣༠ ནས་ཆུ་ཚོད་ ༨།༡༥ བར་ཞོགས་ཚོགས་མང་ཇ།
༢༽ ཆུ་ཚོད་ ༨།༣༠ ནས་ཆུ་ཚོད་ ༩།༤༥ བར་གསུང་ཆོས་རྭ་བ་སྟེ་རྡོ་གཅལ་སྟེང་དུ་ཀིརྟིའི་བྱེས་པ་གྲྭ་ཚང་གི་དགེ་བཤེས་གསུམ་གྱིས་ཚད་མའི་དམ་འཇོག
༣༽ ཆུ་ཚོད་ ༡༠།༠༠ ནས་ཆུ་ཚོད་ ༡༡།༠༠ བར་༸འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་བརྒྱ་དང་བཞི་པ་སྟེ་ཁྲི་ཟུར་རིན་པོ་ཆེ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ནས་གསུང་ཆོས་རྭ་བའམ་རྡོ་གཅལ་གྱི་སྟེང་ནས་སྔ་སྲོལ་ལྟར་སྐྱེས་རབས་ཀྱི་གསུང་ཆོས་བཀའ་དྲིན་བསྐྱངས་གནང་མཛད།
༤༽ ཉིན་གུང་ཆུ་ཚོད་ ༡༡།༡༥ ནས་ཆུ་ཚོད་ ༡༢།༡༥ བར་གུང་ཚིགས་མང་ཇ།
༥༽ ཉིན་གུང་ཆུ་ཚོད་ ༡༢།༣༠ ནས་ཆུ་ཚོད་ ༡།༣༠ བར་དབུ་མ་དང་ཕར་ཕྱིན་གྱི་དམ་འཇོག
༦༽ ཉིན་རྒྱབ་ཆུ་ཚོད་ ༡།༤༥ ནས་ཆུ་ཚོད་ ༤།༤༥ བར་བསམ་ཡས་གླིང་གཙུག་ལག་ཁང་དུ་༸འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་བརྒྱ་དང་བཞི་པ་སྟེ་ཁྲི་ཟུར་རིན་པོ་ཆེ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་སྨོན་ལམ་གྱི་ཚོགས་མགོན་དུ་ཆིབས་བསྒྱུར་གྱིས་སྨོན་ལམ་དངོས་གཞི་ཚོགས་གནང་མཛད།
༧༽ ཆུ་ཚོད་ ༥ ནས་ཆུ་ཚོད་ ༥།༤༥ བར་གཙུག་ལག་ཁང་དུ་དགོང་ཇ།
༨༽ དགོང་མོའི་ཆུ་ཚོད་ ༦།༣༠ ནས་ཆུ་ཚོད་ ༨།༠༠ བར་བསམ་ཡས་གླིང་གཙུག་ལག་ཁང་གི་ཁྱམས་རྭའི་རྒྱལ་མཚན་དཀར་པོའི་འོག་ཏུ་དགེ་བཤེས་གསུམ་གྱིས་དམ་འཇོག་དངོས་གཞི་སྟེ་བླ་མ་གཞུང་གླེང་པས་བཀའ་པོད་ལྔའི་ས་བཅད་བསྐྱོར་ནས་འདུལ་མཛོད་ཀྱི་དམ་འཇོག་དང་། དེ་གྲུབ་པ་དང་རྒྱལ་བ་མ་ལུས་མ་དང་ཆོས་རྒྱལ་མ་སོགས་གསུང་ནས་སྨོན་ལམ་ཉིན་དང་པོ་ལེགས་པར་གྲུབ།
