༄༅།། སྙིགས་དུས་ཀྱི་འདུལ་བ་འཛིན་པ་ཆེན་པོ་དགེ་བཤེས་ཐུབ་བསྟན་དཔལ་བཟང་མཆོག་ནི་ཕྱི་ལོ་༡༩༦༥ ལོར་བལ་བོད་ཀྱི་ས་མཚམས་ཉིན་ཞང་དུ་སྐུ་འཁྲུངས་པ་དང་། དགུང་ལོ་བཅུའི་ཐོག་༸སྐྱབས་རྗེ་ཡོངས་འཛིན་གླིང་རིན་པོ་ཆེའི་ཞལ་སྔ་ནས་ཚིགས་སྔ་མ་དགེ་ཚུལ་གྱི་བསླབ་པ་ལེགས་པར་མནོས་ཏེ་གྲུབ་ཚེ་མཆོག་གླིང་དུ་ཆོས་ཞུགས་མཛད། ཕྱི་ལོ་༡༩༨༠ ལོར་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་དུ་སྒྲིག་ཞུགས་མཛད་ནས། ཡོངས་ཀྱི་དགེ་བའི་བཤེས་གཉེན་ཆེན་པོ་ཤག་སྐོར་ཉི་མ་རྒྱལ་མཚན་དང་། དགའ་ལྡན་ཁྲི་ཐོག་བརྒྱ་དང་གཉིས་པ་སྐྱབས་རྗེ་རི་རྫོང་རྒྱལ་སྲས་རིན་པོ་ཆེ། བློ་གླིང་མཁན་ཟུར་ཡེ་ཤེས་ཐུབ་བསྟན་དཔལ་བཟང་སོགས་མཁས་གྲུབ་གཉིས་ལྡན་གྱི་སྐྱེས་བུ་དམ་པ་མང་པོ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་བསྡུས་གྲྭ་དང་བློ་རྟགས་ནས་བཟུང་གཞུང་ཆེན་བཀའ་པོད་ལྔ་དང་སྔགས་ཕྱོགས་རྒྱུད་སྡེ་བཞི་ལ་སྦྱངས་པ་དཔྱིས་ཕྱིན་པར་མཛད། ཡོངས་རྫོགས་བསྟན་པའི་མངའ་བདག་༸སྤྱི་ནོར་གོང་ས་༸སྐྱབས་མགོན་ཐམས་ཅད་མཁྱེན་པ་མཁན་པོར་བཀུར་ནས་བསྙེན་པར་རྫོགས་ཤིང་། ཡུལ་དུས་གནས་སྐབས་གང་དུ་ཡང་ཚུལ་ཁྲིམས་གཡག་རྔ་བཞིན་དུ་སྲུང་བར་མཛད་པས་བསྟན་པའི་མིག་རྒྱན་དུ་གྱུར།

ཕྱི་ལོ་༡༩༩༧ ལོར་དགེ་བཤེས་དམ་འཇོག་མཛད། དེང་སྐབས་གྲུབ་ཚེ་མཆོག་གླིང་དུ་རྒྱུན་བཞུགས་མཛད་ནས་རྒྱལ་ཕྱི་ནང་གི་དད་ལྡན་དོན་གཉེར་ཅན་རྣམས་ལ་ཆོས་ཀྱི་དགའ་སྟོན་འགྱེད་བཞིན་བཞུགས།

 གསུང་རྩོམ་སྐོར་ལ། <<དབུ་མའི་ཐལ་ཕྲེང་ལུང་རིགས་ནོར་བུའི་དོ་ཤལ།>>དེབ་གཅིག་དང་། ལམ་རིམ་གྱི་ས་བཅད་དང་མཐུན་པར་སྦྱར་བའི་<<མདོ་བཏུས་ལམ་སྒྲིག>>པོད་གཅིག་བཅས་བཞུགས།