སྤེལ་དུས: 04 ཟླ་བདུན་པ། 2016

ཀློག་གྲངས་: 11840

༄༅།། ྋསྐྱབས་མགོན་ཀིརྟི་སྐུ་ཕྲེང་གཉིས་པ་མཐུ་སྟོབས་གྲུབ་པའི་དབང་ཕྱུག་བསྟན་པ་རིན་ཆེན་མཆོག་ནི།རབ་བྱུང་བརྒྱད་པའི་ཤིང་རྟ། ཕྱི་ལོ་༡༤༧༤ ལོར་རྔ་སྨད་ཀྱི་རོང་ཕྱོགས་ཚོགས་གཉིས་སུ་གདུང་ཤ་འཚབ་ཅེས་པར་ཡབ་དཀོན་མཆོག་སྐྱབས་དང་ཡུམ་སྐྱིད་དེ་གཉིས་ཀྱི་སྲས་སུ་ཁྱིམ་ལ་དྲི་བཟང་འཐུལ་བ་སོགས་ངོ་མཚར་བའི་རྟགས་མཚན་དུ་མ་དང་བཅས་སྐུ་བལྟམས་མ་ཐག་ཞལ་ནས་ཡིག་དྲུག་གསུངས་ཤིང་ཡ་མཚན་པར་གྱུར་ནས་ཡུལ་མི་རྣམས་ལ་གསང༌། དགུང་ལོ་གསུམ་བཞེས་སྐབས་ཐུགས་རྗེ་ཆེན་པོས་ཞལ་གཟིགས་ཏེ། སྣང་སེམས་འཁྲུལ་བའི་ངར་འཛིན་ཅན། །དམུ་རྒོད་ལོག་ལྟའི་འགྲོ་བ་མང༌། །ཉེར་གཅིག་ལོ་ལ་མ་སླེབས་བར། །སྦས་པའི་རྣལ་འབྱོར་དོན་དུ་ཆེ། །ཞེས་གསུངས་པ་ལྟར་དེ་ནས་སྦས་པའི་བརྟུལ་ཞུགས་གཙོ་བོར་མཛད། འཇིགས་བྱེད་སོགས་ཡི་དམ་གྱི་ལྷ་ཞི་ཁྲོ་མང་པོས་ཞལ་གཟིགས་ཤིང་འབྲལ་མེད་དུ་བསྐྱངས། ས་བྱ། ཕྱི་ལོ་༡༤༨༩ ལོར་དབུས་སུ་བྱོན་ནས་འབྲས་སྤུངས་སུ་སློབ་གཉེར་གནང་སྟེ་ལོ་འགར་བཞུགས་ཤིང༌།

སྤེལ་དུས: 04 ཟླ་བདུན་པ། 2016

ཀློག་གྲངས་: 11938

༄༅།། ྋསྐྱབས་མགོན་ཀིརྟི་སྐུ་ཕྲེང་གསུམ་པ་འགྲོ་མགོན་གྲུབ་དབང་བསྟན་པ་རབ་རྒྱས་མཆོག་ནི།རབ་བྱུང་དགུ་པའི་ཤིང་བྱི། ཕྱི་ལོ་༡༥༦༤ ལོར་མགོ་ལོག་ཨ་རིག་གསེར་མཛོད་ལུང་གི་ཨ་མྱེ་ཀེ་ཏུ་དམར་ཡག་ཅེས་པའི་རི་མདུན་དཔལ་ཐང་ཞེས་པར་ཡབ་ཡོན་ཏན་དབང་ཕྱུག་དང་ཡུམ་སྐྱིད་མོ་ཡག་གཉིས་ཀྱི་སྲས་སུ་ཡ་མཚན་གྱི་ལྟས་དུ་མ་དང་བཅས་སྐུ་འཁྲུངས་མ་ཐག་ཞལ་ནས་ཧྲཱིཿགསུངས་པས་ཀུན་ཡ་མཚར། ཡབ་ཀྱིས་ས་དེའི་སྐྱེ་བོ་རྣམས་ཡིད་ཆེས་ཕྱིར་འདྲེ་སྲིན་གྱི་སྤྲུལ་པར་ངེས་ཟེར་ནས་ཀེ་ཏུ་དམར་ཡག་གི་རྐེད་མཚམས་ཀྱི་བྲག་སྟེང་ནས་འཕངས་པས། ཕ་བོང་གི་སྟེང་དུ་བརྒྱབ་པས་འདམ་བརྫིས་པ་ལྟར་བྱིས་པའི་རྗེས་གསལ་བར་བྱུང་ཞིང་སྲས་ལ་ཅི་ཡང་མ་གནོད་པར་ཞལ་འཛུམ་པ་དང་བཅས་ཡིག་དྲུག་དང་ཨ་ར་པ་ཙ་གསུང་བཞིན་བཞུགས་པས་ཀུན་གྱིས་གྲུབ་ཐོབ་ཏུ་ངེས་པ་འདྲོངས་པས་དད་གུས་ཞུས། ༼བྲག་རྗེས་དེ་དེང་སང་ཡང་མཇལ་རྒྱུ་ཡོད༽ ཟླ་བ་གཉིས་ལོང་སྐབས་སྤྱན་རས་གཟིགས་སོགས་ལྷག་ལྷ་མང་པོས་ཞལ་གཟིགས་དང་བྱིན་གྱིས་བརླབས་པས་གཏམ་ཅི་འདོད་སྨྲས་ཏེ། ང་ནི་བསྟན་པ་རིན་ཆེན་གྱི་སྐྱེ་བ་ཡིན། སློབ་དཔོན་ཆེན་པོས་བྱིན་གྱིས་བརླབས་པས་སྣང་སྲིད་ཐམས་ཅད་ང་ཉིད་ཁོ་ནའོ་ཞེས་སོགས་གསུངས་པས་ཀུན་གྱིས་ཕྱག་ཡུལ་དུ་གྱུར།

སྤེལ་དུས: 04 ཟླ་བདུན་པ། 2016

ཀློག་གྲངས་: 11584

༄༅།། ྋསྐྱབས་མགོན་ཀིརྟི་སྐུ་ཕྲེང་བཞི་པ་ཐོགས་མེད་བློ་བཟང་འཇམ་དབྱངས་མཆོག་ནི། རབ་བྱུང་བཅུ་གཅིག་པའི་མེ་སྤྲེལ། ཕྱི་ལོ་༡༦༥༦ ལོར་ཚ་ཁོའི་མ་དགོན་དང་ཧ་ཅང་ཐག་མི་རིང་བའི་པཱ་ལ་ཞེས་པར་ཡབ་འབུམ་ཐར་དང༌། ཡུམ་མེ་འགྱུ་ཟེར་བ་གཉིས་ཀྱི་སྲས་སུ་འཁྲུངས། ཟླ་བ་གཉིས་ལོན་པ་ན་ང་ནི་བསྟན་པ་རབ་རྒྱས་ཀྱི་སྐྱེ་བ་ཡིན། ཞེས་དང༌། བསྟན་པ་དར་རྒྱས་ངའི་དབོན་པོ་ཡིན་ཞེས་པ་སོགས་སྔོན་གནས་རྗེས་དྲན་གྱི་གསུངས་མང་པོས་ཀུན་ཡ་མཚན་པར་བྱས། སྐུ་གོང་མའི་རྡོར་དྲིལ་དང་ཕྱག་ཕྲེང་སོགས་ངོས་འཛིན་གནང་བས། དབོན་པོ་དར་རྒྱས་པས་དབུས་གཙང་དུ་ཐུགས་དམ་བརྟག་པར་བཏང་བ་ལ་ྋརྒྱལ་དབང་ལྔ་པ་ཆེན་པོ་དང༌། པཎ་ཆེན་བློ་བཟང་ཡེ་ཤེས། གནས་ཆུང་ཆོས་སྐྱོང་སོགས་བླ་ལྷ་རྣམས་དགོངས་པ་གཅིག་མཐུན་གྱིས་གྲུབ་དབང་བསྟན་པ་རབ་རྒྱས་ཀྱི་ཡང་སྤྲུལ་འཁྲུལ་མེད་ཡིན་པའི་བཀའ་ལུང་བསྩལ།

སྤེལ་དུས: 04 ཟླ་བདུན་པ། 2016

ཀློག་གྲངས་: 12179

༄༅།། ྋསྐྱབས་མགོན་ཀིརྟི་སྐུ་ཕྲེང་ལྔ་པ་མཁས་ཤིང་གྲུབ་པའི་དབང་ཕྱུག་བློ་བཟང་བསྟན་པའི་རྒྱལ་མཚན་དཔལ་བཟང་པོ་ནི། རབ་བྱུང་བཅུ་གཉིས་པའི་ཆུ་འབྲུག ཕྱི་ལོ་༡༧༡༢ ལོར་རྔ་པའི་རྡོ་སྟོད་ཀྱི་ཡུལ་དུ་འཇའ་ཚོན་གྱི་གུར་ཁྱིམ་དང་མེ་ཏོག་གི་ཆར་འབབ་པ་སོགས་བསམ་གྱིས་མི་ཁྱབ་པའི་རྟགས་མང་པོ་དང་བཅས་ཡབ་ཚེ་རིང་དང་ཡུམ་སྐྱིད་མོ་ཡག་གཉིས་ཀྱི་སྲས་སུ་སྐུ་འཁྲུངས། ཆུང་ངུའི་དུས་ནས་སྤྱོད་ལམ་རྣམ་གསུམ་དམན་པའི་སྐྱེ་བོ་ལས་ཁྱད་དུ་འཕགས་ཤིང༌། གསུང་སྒོ་ཕྱེས་ཙམ་ནས་རང་ཉིད་བསྟན་པ་རབ་རྒྱས་ཀྱི་སྐྱེ་སྤྲུལ་ཡིན་པར་གསུངས། སྔོན་གྱི་བག་ཆགས་སད་པའི་མཐུས། དམ་པའི་ཆོས་ཀྱི་ཚིག་དོན་ལ་ཡང་བསམ་པ་ཙམ་གྱིས་ཚེགས་མེད་པར་རྟོགས་ཐུབ་པ་སོགས་རྨད་དུ་བྱུང་བའི་ཡོན་ཏན་དུ་མ་དང་ལྡན་པའི་གཏམ་རིམ་པས་ཀིརྟིའི་ཕྱོགས་ནས་ཐོས་པས། སྐུ་དབོན་རབ་འབྱམས་འཇམ་དབྱངས་དོན་ཡོན་རྒྱ་མཚོ་དང༌། གཉེར་པ་འཇམ་དབྱངས་རྒྱ་མཚོ་སོགས་ཀྱིས་སྐུ་གོང་མའི་ཕྱག་ཕྲེང་དང་རྡོར་དྲིལ་སོགས་སྤྱན་བསྟར་ཕུལ་པ་རྣམས་འཁྲུལ་མེད་དུ་ངོས་འཛིན་གནང་ཞིང༌།

སྤེལ་དུས: 04 ཟླ་བདུན་པ། 2016

ཀློག་གྲངས་: 11638

༄༅།། ྋསྐྱབས་མགོན་ཀིརྟི་སྐུ་ཕྲེང་དྲུག་པ་དགེ་འདུན་ཆོས་ཀྱི་དབང་ཕྱུག་དཔལ་བཟང་པོ་ནི། མདོ་སྨད་རེབ་ཀོང་བསེ་ཆུ་མ་ཞེས་པའི་ཀླུ་རྒྱལ་ཚང་གི་ཁྱིམ་དུ། རབ་བྱུང་བཅུ་གསུམ་པའི་ཆུ་འབྲུག ཕྱི་ལོ་༡༧༧༢ ལོར་ཡབ་ངག་དབང་རབ་བརྟན་དང༌། ཡུམ་སྙིང་མོ་ཐར་གཉིས་ཀྱི་སྲས་སུ་སྐུ་འཁྲུངས་ནས་རིང་པོ་མ་སོང་བར་ང་ཀིརྟིའི་དགོན་དུ་འགྲོ་དགོས་ཞེས་གསུངས་པས་མཚོན་ཡ་མཚན་གྱི་མཛད་སྤྱོད་དུ་མས་སྐྱེས་བུ་རང་ག་བ་ཞིག་མིན་པའི་ངེས་པ་རྙེད། གཞན་ཡང་སྐུ་གོང་མའི་ཕྱག་ཕྲེང་དང་ཕུར་བུ་སོགས་ངོས་འཛིན་མཛད་ཅིང༌། མདོ་དབུས་ཀྱི་བླ་ལྷ་མང་པོའི་ལུང་བརྟག་གཅིག་མཐུན་བྱུང་བ་བཅས་ལ་བརྟེན་ྋསྐྱབས་མགོན་ཀིརྟི་སྐུ་ཕྲེང་ལྔ་པའི་ཡང་སྤྲུལ་དུ་ངོས་འཛིན་གྱིས་མེ་སྤྲེལ། ཕྱི་ལོ་༡༧༧༦ ལོར་གདན་ས་སྟག་ཚང་ལྷ་མོར་གདན་དྲངས་ཏེ་མི་འཇིགས་གདོང་ལྔས་བཏེགས་པའི་སེང་ཁྲི་ལ་དབང་བསྒྱུར། དགེ་བའི་བཤེས་གཉེན་གཡེར་ཤོང་སྤྲུལ་པའི་སྐུ་དགེ་འདུན་ཟླ་གྲགས་ཀྱི་དྲུང་ནས་དགེ་བསྙེན་དང་དགེ་ཚུལ་གྱི་བསླབ་སྡོམ་རིམ་པར་བཞེས། མཛོད་དགེ་རི་ཁྲོད་པ་དང་ཨང་སྨོན་སྤྲུལ་པའི་སྐུ་སོགས་མཁས་ཤིང་གྲུབ་པའི་སྐྱེས་བུ་མང་པོ་རིགས་ཀྱི་ཅོད་པན་དུ་བསྟེན་ནས་མདོ་སྔགས་གཞུང་ལུགས་ཀུན་ལ་མཁས་པར་སྦྱངས།

སྤེལ་དུས: 04 ཟླ་བདུན་པ། 2016

ཀློག་གྲངས་: 12046

༄༅།། ྋསྐྱབས་མགོན་ཀིརྟི་སྐུ་ཕྲེང་བདུན་པ་ཀུན་དགའ་ཆོས་འཕགས་ཐུབ་བསྟན་ཉི་མ་མཆོག་ནི། སྟག་ཚང་ལྷ་མོའི་ཉེ་འདབས་ཚ་ཁོག་ཅེས་པར་ཡབ་བཟོད་པ་དང༌། ཡུམ་སྐུ་གོང་མའི་སྐུ་སྲིང་བཀྲ་ཤིས་སྐྱིད་གཉིས་ཀྱི་སྲས་སུ། རབ་བྱུང་བཅུ་གསུམ་པའི་མེ་སྦྲུལ། ཕྱི་ལོ་༡༧༩༧ ལོར་སྐུ་བལྟམས། ཆུ་ཁྱི། ཕྱི་ལོ་༡༨༠༢ ལོར་འདུལ་བ་འཛིན་པ་གཡེར་གཤོང་སྤྲུལ་སྐུ་དགེ་འདུན་ཟླ་གྲགས་རིན་པོ་ཆེའི་ཞལ་སྔ་ནས་དགེ་བསྙེན་གྱི་སྡོམ་པ་བཞེས་ཏེ་ཀུན་དགའ་ཆོས་འཕགས་ཞེས་མཚན་གསོལ། ཆུ་ཕག ཕྱི་ལོ་༡༨༠༣ ལོར་མཁས་གྲུབ་ཆེན་པོ་གཡེར་ཤོང་ཚང་གི་ཞལ་སྔ་ནས་དགེ་ཚུལ་གྱི་སྡོམ་པ་མནོས་ཏེ་མཚན་སྔ་མའི་སྟེང་དུ་ཐུབ་བསྟན་ཉི་མ་ཞེས་གསོལ། གུང་ཐང་བསྟན་པའི་སྒྲོན་མེས་ྋསྐྱབས་མགོན་སྐུ་གོང་མའི་ཡང་སྤྲུལ་དུ་ངོས་འཛིན་བྱ་འོས་པའི་བཀའ་ལུང་ཕེབས་ཁར། གདན་ས་སྟག་ཚང་ལྷ་མོ་ནས་གལ་བོ་ཆེ་ལ་ནན་ཏན་གྱིས་སྐུ་གོང་མ་རྣམས་ཀྱི་ཕྱག་ཕྲེང་དང་རྡོར་དྲིལ་སོགས་སྤྱན་ལམ་དུ་བསྟར་བ་ཇི་བཞིན་འཛོལ་མེད་ངོས་འཛིན་གནང་བ་བཅས་ཀྱིས་སྐུ་གོང་མའི་ཡང་སྤྲུལ་འཁྲུལ་མེད་དུ་ཐག་ཆོད་ངེས་རྙེད་བྱུང་སྟེ།

སྤེལ་དུས: 04 ཟླ་བདུན་པ། 2016

ཀློག་གྲངས་: 12289

༄༅།། ྋསྐྱབས་མགོན་ཀིརྟི་སྐུ་ཕྲེང་བརྒྱད་པ་བློ་བཟང་འཕྲིན་ལས་དཀོན་མཆོག་བསྟན་པ་རྒྱ་མཚོ་མཆོག་ནི། རབ་བྱུང་བཅུ་བཞི་པའི་ས་བྱ། ཕྱི་ལོ་༡༨༤༩ ལོར་ཡུལ་མཚོ་སྔོན་རྩེ་གཞུང་བྱང་སོག་ཏུ་ངོ་མཚར་བའི་རྟགས་མཚན་དུ་མ་བཅས་ཡབ་གཏེར་སྟོན་སྔགས་འཆང་བདེ་ཆེན་རྡོ་རྗེ་དང་ཡུམ་ཇོ་མོ་ཐར་གཉིས་ཀྱི་སྲས་སུ་སྐུ་བལྟམས། གསུང་བཀྲོལ་མ་ཐག་མ་ཎི་གསུངས་ཤིང༌། ངའི་དགོན་པ་ཤར་ཕྱོགས་ན་ཡོད། ཅེས་དང༌། ཁྱེད་སུ་ཡིན་ཞུས་པར་ང་བསྟན་པའི་རྒྱལ་མཚན་ཡིན་སོགས་གསུངས། ཆུ་གླང༌། ཕྱི་ལོ་༡༨༥༣ ལོར་བླ་བྲང་བཀྲ་ཤིས་འཁྱིལ་དུ་སྟག་ཚང་ལྷ་མོའི་ཚོགས་ཆེན་ཁྲི་ལས་ཐོག་པ་ཐུབ་བསྟན་མཐའ་ཡས་ཚང་གིས་གཙོས་ཚོགས་འདུ་ལས་སྣེ་ལྷན་འཛོམས། བླ་བྲང་བཀྲ་ཤིས་འཁྱིལ་གྱི་གསེར་ཁྲི་རྣམ་པ་དང༌། མཁན་སྤྲུལ་དུ་མས་གཙོས་གྲྭ་ཚང་བཞིའི་དགེ་འདུན་ཡོངས་འདུས་པའི་དབུས་སུ་ཀུན་མཁྱེན་འཇམ་དབྱངས་བཞད་པ་འཇིགས་མེད་རྒྱ་མཚོ་མཆོག་གིས་ཡ་མཚན་པའི་ལྟས་དུ་མ་དང་བཅས་ྋསྐྱབས་མགོན་ཀིརྟི་སྐུ་གོང་མའི་ཡང་སྤྲུལ་འཁྲུལ་མེད་དུ་ངོས་འཛིན་མཛད་དེ་བློ་བཟང་འཕྲིན་ལས་བསྟན་པ་རྒྱ་མཚོ་ཞེས་པའི་མཚན་གསོལ།

སྤེལ་དུས: 04 ཟླ་བདུན་པ། 2016

ཀློག་གྲངས་: 12096

༄༅།། ྋསྐྱབས་མགོན་ཀིརྟི་སྐུ་ཕྲེང་དགུ་པ་སྐལ་བཟང་བློ་གྲོས་ཀུན་དགའ་ལུང་རྟོགས་རྒྱ་མཚོ་མཆོག་ནི། གདན་ས་སྟག་ཚང་ལྷ་མོ་བློ་གླིང་དགེ་ལྡན་བཀྲ་ཤིས་འཁྱིལ་གྱི་ཉེ་འདབས་སྐུ་གོང་མའི་མ་ཡུམ་གཞིས་ཀར། ཡབ་བཞག་ལྡོམ་དཔོན་པོ་སྦྱིན་པ་དང༌། ཡུམ་མཁའ་འགྲོ་འཚོ་གཉིས་ཀྱི་སྲས་སུ། ཤིང་སྦྲུལ་ཟླ་༡༡ ཚེས་༡༧  ཕྱི་ལོ་༡༩༠༥ ལོར་ངོ་མཚར་བའི་ལྟས་དུ་མ་བཅས་སྐུ་བལྟམས། ས་སྤྲེལ། ཕྱི་ལོ་༡༩༠༨ ལོར་ྋརྒྱལ་དབང་བཅུ་གསུམ་པ་ཆེན་པོ་ཐུབ་བསྟན་རྒྱ་མཚོ་དང༌།  ཀུན་མཁྱེན་འཇམ་དབྱངས་བཞད་པ་སྐུ་ཕྲེང་བཞི་པ་སྐལ་བཟང་ཐུབ་བསྟན་དབང་ཕྱུག རྗེ་ཞྭ་དམར་པ་དགེ་འདུན་བསྟན་འཛིན་རྒྱ་མཚོ་བཅས་ཀྱི་ལུང་བརྟག་གཅིག་མཐུན་བྱུང་ དོན་ལྟར་འཇམ་དབྱངས་བཞད་པས་ཀིརྟི་སྐུ་ཕྲེང་བརྒྱད་པ་བློ་བཟང་འཕྲིན་ལས་ཚང་གི་ཡང་སྤྲུལ་འཁྲུལ་མེད་དུ་ངོས་འཛིན་དང་ཞབས་བརྟན་གསོལ་འདེབས་ལྗགས་རྩོམ་གནང༌།